د البیروني پوهنتون استادانو ته د “د اسلامي شریعت له نظره د آمر پر رعیت او د رعیت پر آمر حقوق ” تر سرلیک لاندې یو ورځنی ښوونیز سمینار وړاندې شو
د “د اسلامي شریعت له نظره د آمر پر رعیت او د رعیت پر آمر حقوق ” تر سرلیک لاندې یو ورځنی ښوونیز سمینار، د البیروني پوهنتون د علمي چارو معاونیت اړوند د استادانو د مسلکي پراختیا مرکز آمریت له لوري، د دې پوهنتون استادانو ته د نشراتو آمریت په تالار کې وړاندې شو.
په دې سمینار کې، چې د البیروني پوهنتون مشرتابه پلاوي، د پوهنځیو رئیسانو او د علمي کادر ټولو غړو ګډون کړی و، په پیل کې د البیروني پوهنتون عمومي رئیس، ښاغلي شیخالحدیث سید بشیرآغا هاشمي، د سمینار له تنظیموونکو او وړاندې کوونکي څخه د مننې تر څنګ، د دا ډول ښوونیزو پروګرامونو پر اهمیت خبرې وکړې.
وروسته، د همدې پوهنتون د شرعیاتو پوهنځي استاد، ښاغلي پوهنیار خالمحمد نیکزاد، د آمر او رعیت ترمنځ د متقابلو حقوقو او وجایبو په اړه د قرآني آیتونو او نبوي احادیثو په رڼا کې هر اړخیز او مفصل معلومات وړاندې کړل. نوموړي همداراز د مشروع اطاعت پر اصولو، د صلاحیتونو پر حدودو، مسؤلیتپذیرۍ او د دې حقوقو د رعایت پر ټولنیزو اغېزو مهم او ګټور مطالب له ګډونوالو سره شریک کړل.
د سمینار ګډونوالو د وړاندې شوو مطالبو هرکلی وکړ او د ورته علمي او ښوونیزو پروګرامونو پر دوام یې ټینګار وکړ.
په پای کې د دعوت او ارشاد آمر ښاغلي مولوي عبدالکریم محمدي ګډونوالو ته اصلاحي وینا وکړه او یاد سمینار د خیر په دعا سره پای ته ورسېد.
