د «ولاء او براء (له مسلمانانو سره دوستي او له کفارو سره دښمني)» تر سرلیک لاندې یو ورځنی ښوونیز سمینار د البیروني پوهنتون استادانو ته وړاندې شو
د «ولاء او براء (له مسلمانانو سره دوستي او له کفارو سره دښمني)» تر سرلیک لاندې یو ورځنی ښوونیز سمینار د البیروني پوهنتون استادانو ته، د دغه پوهنتون د استادانو د مسلکي ودې په تالار کې وړاندې شو.
په دې سمینار کې، چې د بېلابېلو پوهنځیو ګڼ شمېر استادانو ګډون کړی و، محترم شیخالحدیث مولوي شاکرالله وحدت، د البیروني پوهنتون علمي مرستیال او د سمینار وړاندې کوونکي، د اسلامي شریعت له نظره د ولاء او براء مفهوم، اهمیت او ځایگاه، او د مسلمانانو په فردي او ټولنیز ژوند کې د هغه د رعایت څرنګوالي په اړه ګډونوالو ته مفصل او هر اړخیز معلومات وړاندې کړل.
نوموړي همدارنګه د مسلمانانو ترمنځ د دوستۍ او یووالي، د اسلامي ورورولۍ د پیاوړتیا، او له غیرمسلمانانو سره د اسلامي شریعت له لیدلوري د تعامل او چلند د اصولو په اړه ګټور معلومات او څرګندونې له ګډونوالو سره شریکې کړې.
ګډونوالو د وړاندې شویو مطالبو هرکلی وکړ او د ورته علمي او ښوونیزو پروګرامونو پر دوام یې ټینګار وکړ.