د البیروني پوهنتون د داخلي سړکونو د پخولو او رغولو چارې ۵۵ سلنې ته ورسېدې.
د البیروني پوهنتون د داخلي سړکونو د جوړولو چارې، چې ټولټال ۲.۸ کیلومتره اوږدوالی لري او د ۶۴ میلیونه افغانیو په لګښت ترسره کېږي، د تخنیکي پلان له مخې ۵۵ سلنه بشپړې شوې دي.
په دې پروژه کې د سړکونو د غاړو ویالو جوړول، د سړکونو ډکول او چمتو کول، د ښوونې او روزنې، اقتصاد او کرنې پوهنځیو په مسیر کې د یوه معیاري پل جوړول او د پلچکونو جوړول شامل دي. تر اوسه د یاد پل د جوړولو چارې ۲۰ سلنه او د پلچکونو د جوړولو چارې ۸۵ سلنه بشپړې شوې دي.
د البیروني پوهنتون مسؤلین د دې پروژې د تطبیق له بهیر څخه د دوامدارې څارنې ترڅنګ، د کار پر کیفیت او د تخنیکي معیارونو پر رعایت ټینګار کوي او هیله څرګندوي، چې د یادې پروژې په بشپړېدو سره به د استادانو، محصلانو، کارکوونکو او مراجعینو لپاره د تګ راتګ اسانتیاوې، خوندي او معیاري شي.
د یادونې وړ ده، چې د دې پروژې چارې لا هم روانې دي او ټاکل شوې ده، چې د ټاکل شوي مهالوېش له مخې بشپړې شي.
