د البيروني پوهنتون د رئيس پيغام!

 

3 میاشتې 3 اونی ago

د البیروني پوهنتون د رئیس پیغام

السلام علیکم ورحمة‌الله وبرکاته

تر هر څه د مخه د دواړو جهانونو له رب څخه شکر ادا کوم چې ماته یې توان او توفیق راکړ او د  امیرالمؤمنین حفظه‌الله تعالی و رعاه د نېکو پېرزوینو او مهربانۍ څخه د زړه له کومې مننه او شکران ادا کوم چې پر ما یې اعتماد وکړ او د دې علمي بنسټ د نوي خدمت‌ګزار په توګه یې د البیروني پوهنتون د ریاست دروند مسؤلیت را وسپاره. دا اعتماد زما لپاره لوی ویاړ او په عین حال کې درنه دنده او  مسؤلیت دی.

البیروني پوهنتون، چې نوم یې د اسلامي تمدن له سترو عالمانو څخه اخېستل شوی او د روښانتیا او حقیقت‌پالنې نښه ده، تل د فکر، د علم د تولید او د ځلاندو استعدادونو د روزنې پناه‌ځای پاتې شوی دی. پوره باور لرم چې د پوهنتون د پرمختګ او انکشاف ترڅنګ، د دې مقام ساتنه او په ټولو برخو کې یې لا لوړول، یوازې د پوهنتون د علمي او اداري ټولنې د ټولو غړو د یووالي، همکارۍ او ګډو، جدي هڅو په مټ شوني دي.

زما او زما د همکارانو رسالت او ژمنتیا دا ده چې د علمي او اخلاقي ارزښتونو په ساتنه، د اداري شفافیت او عدالت په ټینګښت د ښوونیز کیفیت په لوړولو د بنسټیزو او تطبیقي څېړنو په پیاوړتیا د اکادمیکو بنسټونو په بیا رغونه او په ملي او نړۍواله کچه د علمي همکاریو په پراختیا سره، د پوهنتون د بدلون او پرمختګ لاره په ټینګو ګامونو، جديت او منظمې برنامې تعقیب کړو.

په درناوي او د ټولو لپاره د بریا په هیله

 

په درناوي

 شیخ القرآن و الحدیث سید بشیر آغا " هاشمي "

د البیرونی پوهنتون عمومی رئیس