د البیروني پوهنتون نړیوالې مجلې د علمي مقالو لپاره د DOI نړۍواله شمېره ترلاسه کړه
الحمدلله، د البیروني پوهنتون نړۍواله علمي مجله د Crossref په نوم د معتبر نړیوال بنسټ د غړیتوب رسمي پړاوونه په بریالیتوب سره بشپړ کړل او خپلو علمي مقالو ته یې د DOI یا (Digital Object Identifier) نړیوالې او دایمي ډیجیټلي پېژندپاڼې ترلاسه کړې.
دغه DOI شمېره په نړیواله کچه د علمي نشراتو د معیاري کولو او اعتبار لوړولو له مهمو معیارونو څخه ګڼل کېږي، چې د علمي مقالو د دقیقې پېژندنې، دایمي لاسرسي، معیاري استناد ورکولو او په نړیوالو معتبرو ډیټابېسونو او علمي ځایونو کې د پراخ حضور زمینه برابروي.
د دې نړیوالې پېژندپاڼې ترلاسه کول، د البیروني پوهنتون د علمي او څېړنیز اعتبار د پیاوړتیا، د مجلې د علمي کیفیت د لوړوالي او په ملي او نړیواله کچه د څېړنیزو فعالیتونو د پراختیا په برخه کې مهم او ارزښتناک ګام بلل کېږي. همدارنګه، دغه لاسته راوړنه به د ملک د استادانو او څېړونکو علمي آثار په نړیواله کچه په لا ښه توګه معرفي کړي.
دغه بریا د مجلې د تحریر هیئت د دوامداره هڅو، د علمي مجلې آمریت د همکارۍ، د البیروني پوهنتون د رهبرۍ د ملاتړ او د تخنیکي همکارانو د ګډو هلو ځلو پایله ده.
تمه کېږي چې د همدې علمي او اکاډمیک بهیر په دوام سره به د باکیفیته علمي مقالو د جذب، د علمي همکاریو د پراختیا او د څېړنیزو فعالیتونو د ودې زمینه لا نوره هم پراخه شي.
د لاسرسي لینک: https://doi.org/10.67054/auij/.v2i1.89
