د دوحې تړون د کتاب د سیالۍ ازموینې د جایزو د وېش غونډه په البیروني پوهنتون کې ترسره شوه
د «دوحې تړون» کتاب د سیالۍ ازموینې د جایزو د وېش غونډه، د البیروني پوهنتون د رهبرۍ پلاوي، د کاپیسا ولایت د حصهٔ اول ولسوالۍ ښاروال او د تنویر فرهنګي ادارې د مسؤلینو په حضور کې، په البیروني پوهنتون کې ترسره شوه.
په دې غونډه کې د البیروني پوهنتون رئیس، محترم شیخالحدیث سیدبشیر آغا هاشمي، د دې سیالۍ له تنظیموونکو او ګډون کوونکو محصلانو څخه د مننې ترڅنګ، د مطالعې، کتابلوستنې او د محصلانو د علمي او فرهنګي پوهاوي د زیاتوالي پر اهمیت ټینګار وکړ. نوموړي د دا ډول سیالیو ترسره کول د محصلانو د مطالعې هڅونې او د هغوی ترمنځ د سالمې سیالۍ د روحیې د رامنځته کولو په برخه کې مهم وبلل.
همدارنګه، د البیروني پوهنتون مالي او اداري مرستیال په خپلو خبرو کې د هغو علمي، فرهنګي او سیالیزو پروګرامونو پر ملاتړ ټینګار وکړ چې د محصلانو د علمي او فکري ودې زمینه برابروي، او د دا ډول پروګرامونو ترسره کول یې د محصلانو د علمي او فکري ودې په برخه کې اغېزناک وبلل.
وروسته، په دې سیالۍ کې یوه ګډون کوونکي محصل د «دوحې تړون» کتاب د سیالۍ ازموینې له ترسره کېدو څخه د خوښۍ څرګندولو ترڅنګ، له تنظیموونکو څخه مننه وکړه او د دا ډول سیالیو ترسره کول یې د محصلانو د مطالعې او کتابلوستنې د هڅونې لپاره مناسبه زمینه وبلله.
وروسته، هغو محصلانو ته چې په یاده سیالۍ ازموینه کې یې له لومړي څخه تر لسم مقام پورې مقامونه ترلاسه کړي وو، د مسؤلینو او د غونډې د مېلمنو له لوري په پام کې نیول شوې جایزې ووېشل شوې. په دغو جایزو کې کمپیوټر، سمارټ موبایل، بایسکل او نغدي جایزې شاملې وې.
د یادونې وړ ده چې دغه سیالي د البیروني پوهنتون د شاوخوا ۷۰۰ تنو محصلانو په ګډون، د البیروني پوهنتون د ارشاد او دعوت آمریت او د محصلانو معاونیت له لوري، د تنویر فرهنګي ادارې په همغږۍ ترسره شوې وه.
په پای کې، د البیروني پوهنتون مسؤلینو د مطالعې د فرهنګ د پیاوړتیا، د محصلانو د کتابلوستنې د هڅونې او د هغوی د علمي پوهاوي د کچې د لوړولو په موخه، د دا ډول علمي، فرهنګي او سیالیزو پروګرامونو پر دوام ټینګار وکړ.
