په البیروني پوهنتون کې د کاپیسا علماوو کرامو کلنۍ ازموینه په رسمي ډول پيل شوه
د کاپیسا ولایت د دیني او جهادي مدارسو د علماوو کرامو د عالمیه او عالیه دورو کلنۍ ازموینه نن د شنبې په ورځ د البیروني پوهنتون په جامع مسجد کې په رسمي ډول پيل شوه.
دغه ازموینه په داسې فضا کې پرانیستل شوه چې د کاپیسا ولایت والي ښاغلي الحاج قاري احسانالله بریال، د البیروني پوهنتون عمومي رئیس ښاغلي شیخالحدیث سید بشیر آغا هاشمي، د پوهنتون درنو مرستیالانو، د ازموینې د مدیره هیئت غړو، نګرانانو او د لوړو زدهکړو د قدرمن وزارت د دیني جامعاتو او تخصصاتو ریاست استازي پکې ګډون کړی و.
د پروګرام په پيل کې، د البیروني پوهنتون عمومي رئیس ښاغلي شیخالحدیث سید بشیر آغا هاشمي د ازموینې د ښه تنظیم، شفاف ترسراوي او عادلانه ارزونې په اړه هر اړخیزې خبرې وکړې او ګډونوالو ته یې د نظم، امانتدارۍ او مسؤلیتپالنې پر ارزښت ټینګار وکړ.
ورپسې، د کاپیسا ولایت والي ښاغلي الحاج قاري احسانالله بریال ګډونوالو ته وینا وکړه او دغه ازموینه یې د علماوو د علمي ظرفیت د ارزونې او د دیني زدهکړو د معیار د لوړولو لپاره مهمه وبلله. نوموړي زیاته کړه چې هغه علم او پوهه، چې فاضلانو ترلاسه کړې ده، باید په پوره اخلاص، صداقت او امانتدارۍ سره نورو ته هم ورسېږي، څو ټولنه ترې ګټه واخلي. د خپلو خبرو په پای کې، والي صاحب د ازموینو ټولو ګډونوالو ته د بریا او کاميابۍ دعا وکړه.
همدارنګه، د لوړو زدهکړو د قدرمن وزارت د دیني جامعاتو او تخصصاتو ریاست استازي د ازموینې په تخنیکي اړخ خبرې وکړې او ګډونوالو ته یې د ازموینې د میکانېزم، اصولو، د پوښتنو د ترتیب، د ارزونې د بهیر او د شفافیت د تأمین په اړه لازم وضاحت وړاندې کړ.
له ویناوو وروسته، د ازموینې د پوښتنو او ځواب پاڼو پاکټونه د ټولو ګډونوالو په مخ کې پرانیستل شول او ورسره ازموینه په رسمي ډول پيل شوه.
د یادونې وړ ده چې په دې کلنۍ ازموینه کې د کاپیسا ولایت له بېلابېلو دیني او جهادي مدارسو څخه ۲۰۸ تنه علماوو کرام ګډون لري، چې دغه بهیر به د شپږو ورځو په ترڅ کې په منظم، شفاف او د ټاکل شويو اصولو سره سم دوام وکړي.
