په البیروني پوهنتون کې د "پایلې پر بنسټ ولاړه زدهکړه او محصلمحوري" تر سرلیک لاندې ورکشاپ پیل شو
د البیروني پوهنتون د استادانو د مسلکي پراختیا مرکز له لوري او د لوړو زدهکړو وزارت د استادانو د مسلکي پراختیا مرکز آمریت په ملاتړ او همغږۍ، د دې پوهنتون د علمي کادر د غړو د مسلکي پوهې او تدريسي مهارتونو د کچې لوړولو په موخه، د "پایلې پر بنسټ ولاړه زدهکړه او محصلمحوري" (OBE–SCL) تر سرلیک لاندې لس ورځنی علمي ـ مسلکي ورکشاپ د پوهنتون د کنفرانسونو په تالار کې په رسمي ډول پیل شو.
په دغه ورکشاپ کې د البیروني پوهنتون درنې رهبرۍ، د نههګونو پوهنځیو رئیسانو او د دې پوهنتون استادانو ګډون کړی و. د پروګرام په پيل کې د قرآنکريم د مبارکو آيتونو له تلاوت وروسته، د البیروني پوهنتون د څېړنو او علمي مجلې مرستیال ښاغلي پوهندوی ګلآقا انوري خبرې وکړې. نوموړي د یاد ورکشاپ ارزښت او موخې مهمې وبللې او ټینګار یې وکړ چې د پایلې پر بنسټ او محصلمحوره تدریس دودول د لوړو زدهکړو د کیفیت د لوړولو، د محصل فعال ګډون او د پوهنتون د علمي معیارونو د پیاوړتیا لپاره بنسټیز اهمیت لري. هغه همدارنګه وویل چې دغه ډول پروګرامونه د استادانو لپاره زمینه برابروي څو له عصري تدريسي میتودونو سره بلدتیا پیدا کړي او خپلې څېړنیزې او تدريسي وړتیاوې لا پياوړې کړي.
