په البیروني پوهنتون کې د «پرمختللې رهبرۍ» څلور ورځنی ورکشاپ په رسمي ډول پیل شو
د البیروني پوهنتون د استادانو مسلکي پراختیا مرکز د کنفرانسونو په تالار کې د پوهنتون د درنې رهبرۍ او د پوهنځیو د رئیسانو لپاره د «پرمختللې رهبرۍ» تر سرلیک لاندې څلور ورځنی تخصصي ورکشاپ په رسمي ډول پیل شو.
د یاد ورکشاپ د پرانیستې په مراسمو کې د البیروني پوهنتون عمومي رئیس، ښاغلي شیخالحدیث سید بشیر آغا هاشمي وینا وکړه. نوموړي د قرآن عظیمالشان او اسلامي شریعت په رڼا کې د رهبرۍ پر ارزښت، مسؤلیت او اهمیت هر اړخیزې خبرې وکړې او زیاته یې کړه، چې رهبري یو ستر عامه امانت دی او په اغېزمنې او بریالۍ رهبرۍ کې علم، تدبیر او حاکمیت بنسټیز اصلونه دي.
ورپسې، د پروان پوهنتون استاد، محترم پوهنوال دکتور سید مبین هاشمي، د دې ورکشاپ علمي او مسلکي برخه په رسمي توګه پرانیسته او د پرمختللې رهبرۍ د معاصرو اصولو، نوښتونو او رهبرۍزو مهارتونو پر اړتیا یې تفصیلي رڼا واچوله.
د یادونې وړ ده، چې دغه ورکشاپ د البیروني پوهنتون د علمي چارو معاونیت اړوند د استادانو د مسلکي پراختیا آمریت له لوري تنظیم شوی، چې پکې به د پرمختللې رهبرۍ اړوند هر اړخیز علمي، اداري او مدیریتي مطالب وړاندې شي. دغه ورکشاپ به څلور ورځې دوام ولري او موخه یې د پوهنتون د رهبرۍ د ظرفیتونو پیاوړتیا، اغېزمنتیا او مسلکي ودې ته زمینه برابرول دي.
